分享:

旅遊掃貨有水回東南亞多國退稅攻略

2016-12-06, on 信用卡旅遊優惠

旅遊掃貨有水回東南亞多國退稅攻略...

有唔少國家都有消費稅或增值稅,本地人買嘢要畀稅,外國旅客就可以退稅,吸引佢哋消費。香港人經常去嘅日、韓、台、星 / 新、馬、泰,都有退稅制度,今次就同大家講下呢啲國家嘅退稅資料。

亞洲各國退稅資料

日本
稅率:8%
消費金額:¥5,000以上 (一般貨品未連稅,同一日同一商戶)
消費金額:¥5,000 - ¥500,000 (消耗品未連稅,同一日同一商戶)
退稅地點:商戶
退稅手續:
喺有「Japan. Tax-Free Shop」標誌嘅舖頭買嘢,埋單時商戶會即場辦理退稅手續,如果喺百貨公司,有專門退稅嘅櫃位,帶住商品、收據同護照去辦手續。店員會喺護照釘上「輸出免稅物品購入記錄票」,過海關時關員會撕走,如果店員將商品封入密封膠袋,記得唔好拆封,跟身帶埋過關,因為海關可能會Check。

日本退稅表誌。


韓國
稅率:10%
消費金額:30,000韓圜以上 (商店即場退稅)
退稅地點:商戶、市區退稅點、機場
退稅手續:
商戶即場退稅-有7個唔同嘅退稅公司,認住有貼其中一個就可以退稅。單筆最高金額200,000韓圜,整個行程計1,000,000韓圜,其後消費額要喺機場退稅。

市區退稅點-可以問店員攞退稅單 (機場退稅都要用),帶埋護照同信用卡去市區退稅點退返現金,不過要用信用卡先過數擔保,去到機場要去海關指定櫃位檢查,再取消返信用卡擔保。

機場退稅-先去Check-in攞登機證,如果商品要寄艙,地勤貼完行李貼紙要問佢拎返件行李,話去退稅。退稅要出示護照,登機證,退稅單、行李貼紙、商品,如果單一退稅額少過75,000韓圜就唔使去海關檢查,去電子退稅機辦手續,過海關,去退稅櫃位攞錢就OK。如果之前做咗市區退稅,或者單一退稅額超過75,000韓圜,就要去海關檢查確認,先至過關再去退稅櫃位攞錢。

韓國退稅標誌。


台灣
稅率:5% (退稅服務手續費14%)
消費金額:2,000新臺幣以上 (含稅,同一日同一商戶)
退稅地點:商戶、市區退稅點、機場
退稅手續:
現場小額退稅-貼有「外籍旅客購物退稅標誌」嘅舖頭,買滿24,000新臺幣以下 (含稅),嗰次行程小額退稅消費額120,000新臺幣或以上,或同年小額退稅消費額240,000新臺幣或以上,就要去機場退稅。

特約市區退稅-埋單時問舖頭拎「退稅明細申請表」,帶齊信用卡、收據、退稅明細申請表去市區退稅服務櫃檯,用信用卡交擔保金,收齊退稅單據同錢,去到機場出境前,去退稅機退稅服務櫃檯檢查,取消擔保金。

機場退稅-出境前去去自動退稅機或退稅服務櫃檯睇下使唔使經海關檢查,如果唔需要檢查,或者檢查完,就可以去退稅。退稅可以揀現金、支票或入落信用卡戶口。

台灣退稅標誌。


新加坡
稅率:7% (退稅會收手續費)
消費金額:100新元以上 (同一日同一商戶)
退稅地點:機場
退稅手續:
喺可以退稅嘅舖頭買嘢,問店員攞退稅單,去機場Check-in前去自動退稅機或退稅櫃位辦手續同檢查商品,攞退稅證明,過關後可以指定櫃位退現金。如果想退落信用卡戶口,可以直接喺自動退稅機搞。

新加坡退稅標誌。


馬來西亞
稅率:6% (退稅會收15%手續費,酒精類商品、煙草製品不可退稅)
消費金額:300馬幣以上 (含稅,同一日同一商戶)
退稅地點:機場
退稅手續:
喺可以退稅嘅舖頭買嘢,問店員攞退稅單。去機場Check-in前帶齊護照、退稅單、購物收據、商品去退稅櫃位檢查。海關確認可以退稅之後,就可以過關,再去指定櫃位退錢。退稅可以揀退現金 (退稅金額唔超過300馬幣)、信用卡或支票。

馬來西亞退稅標誌。


泰國
稅率:7% (退稅率按消費金額而不同,唔會退足7%)
消費金額:2,000泰銖以上 (同一日同一商戶)
退稅地點:機場
退稅手續:
有「VAT Refund for Tourists」標誌嘅舖頭代表可以退稅,埋單時會有一張退稅表 (P.P.10),填返基本個人資料,離境時喺國際級機場海關檢查退稅單、收據同退稅商品之後,就可以Check-in過關,再去攞返錢。如果退稅少於30,000泰銖就收現金,超過的話就出匯票或入落信用卡戶口。

泰國退稅標誌

泰國退稅金額表,亦可以去呢個網頁下面有計數機,入銀碼就會自動計出嚟。


退稅Q&A

Q:點樣先知嗰間舖頭買嘢有得退稅?
A:只有參與退稅計劃嘅舖頭可以退稅,都會喺當眼處貼住退稅標誌。通常退稅標誌都係統一,不過亦有例外,例如韓國有7個退稅平台,就有7個標誌。

Q:邊啲貨品唔可以退稅?
A:每個國家都唔同,買之前可以問下店員。一般嚟講,喺境內用過嘅商品冇得退稅,就好似日本藥妝,買嗰陣店員會放入密封袋,嚴格嚟講去到機場檢查前都唔可以拆開,開咗袋佢當你用過,就冇得退稅。又例如馬來西亞買酒精類商品、煙草製品就冇得退稅。

Q:係咪要主動攞退稅單?
A:除咗直接店內退稅,如果係某啲要去機場退稅嘅國家,最好主動同店員講要退稅,咁佢就會幫你填退稅單。如果冇退稅單,單憑買嘢嘅收據係退唔到稅。

Q:如果搭凌晨機 / 超早機,退稅櫃位未開 / 冇人辦公,又冇自助退稅機 / 自助退稅機冇得直接退錢,點算好?
A:如果退稅櫃位未開、冇工作人員喺度、遲咗去機場或太多人退稅排晒長龍,可以睇下有冇投遞箱,將退稅單放入專用信封再放入投遞箱,然後等退稅寄支票或入數落信用卡戶口。

Q:如果簽卡買嘢之後退稅,會唔會扣返信用卡積分或里數?
A:如果退返落信用卡,有可能會扣返信用卡積分或里數,因為信用卡條款通常都會列明,如果係退款嘅交易,係唔會當係合資格交易,而退稅有可能會被視為退款嘅交易。如果係退現金嘅話,就冇呢個問題。

分享: