分享:

信用卡免費享用機場候機貴賓室

2016-12-06, on 信用卡旅遊優惠

信用卡免費享用機場候機貴賓室...

好多信用卡都有機場候機貴賓室優惠,可以憑信用卡或附送嘅機場候機貴賓室會籍免費入去Hea住等,如果習慣提早去機場,輕輕鬆鬆施施然咁上機,又或者遇上Delay就啱晒。今次我就列咗一啲有免費機場候機貴賓室優惠嘅卡出嚟,方便大家申請返一,兩張傍身。

表格放大版在此

親民之選-東亞JCB白金卡 / 銀聯雙幣鑽石卡
申請門欖最低嘅,應該係東亞JCB白金卡,年薪$40,000或以上就可以申請。不過要留意嘅係,香港發行嘅東亞JCB白金卡係唔可以入返發行地,即係香港嘅機場候機貴賓室,外國就可以。
另外,交通銀行、創興銀行、Citibank、匯豐嘅銀聯雙幣鑽石卡,年薪要求$150,000,都係比較貼地嘅選擇。

另類選擇-工銀亞洲香港航空Visa白金卡
單計香港都有好多卡入到機場候機貴賓室,仲有其他國家旅客,所以經常有迫爆機場候機貴賓室、排晒長龍嘅情況。揀一啲另類啲嘅機場候機貴賓室,可能仲會清靜啲舒服啲。工銀亞洲香港航空Visa白金卡可以入香港機場嘅香港航空貴賓室,呢個貴賓室係搭香港航空嘅商務艙乘客,同埋金鵬會俱樂部白金卡、金卡、銀卡會員先免費入得,相對會少啲人嘅。

香港航空貴賓室「紫荊堂」

最平Priority Pass-交通銀行白金卡 / 美國運通國泰航空尊尚信用卡
交通銀行白金卡只要年薪$150,000就可以申請,可以免費申請Priority Pass會籍,但係頭一年冇得免費入,要累積簽夠指定金額,下年先會有若干次免費。
至於真正首12個月免費入到Priority Pass貴賓室嘅,就係美國運通國泰航空尊尚信用卡,申請年薪要求$300,000,頭12個月4次免費,同埋每年累積簽賬滿$150,000,下年繼續免費4次。

個個Lounge都入得?
雖然環亞機場貴賓室喺唔少機場都有,不過有啲卡係只限入香港嘅機場貴賓室。再以香港機場為例,環亞機場貴賓室都有幾個,東翼又有、西翼又有、抵港大堂都有,不過有啲卡只可以入指定某個機場貴賓室,入之前記得問清楚。

機場候機貴賓室位置:
Priority Pass:https://www.prioritypass.com/zh-TW/airport-lounges
環亞:https://www.plaza-network.com/locations

帶人免費入Lounge?
有好多人都會問,自己有兩張卡都可以免費入機場候機貴賓室,可唔可以帶埋其他人免費入去?其實嚴格嚟講係唔得嘅,因為除咗少數卡列明同行者免費,多數卡都講明,只可以俾卡主免費入,帶人入去係要收錢。至於有人試過話可以,我相信係當時機場候機貴賓室職員行個方便,酌情處理。

分享: