分享:

係時候衝出亞洲今年10大最佳旅遊城巿係?

2017-01-02, on 信用卡旅遊優惠

係時候衝出亞洲今年10大最佳旅遊城巿係?...

香港人去旅行,去日韓台可以話去到悶,泰國同星馬都係港人非常熟悉嘅旅遊國家,冇乜新意。咁旅遊指南權威Lonely Planet會認為2017年嘅10大最佳旅遊城巿係邊幾個?唔使急,依家咪揭盅囉,不妨作為參考,下次考慮去吓呢啲地方吖。

 

No.1 法國 波爾多

 

▼「葡萄酒之城」(La Cité du Vin)嘅外形就如一個巨形醒酒瓶。

 

法國波爾多出名嘅係紅酒,呢個酒城成為Lonely Planet 2017年10大旅遊城巿首位,究竟點解?原因有幾個,首先波爾多氣候宜人,一直係法國本地及世界各地遊客度假同度蜜月嘅理想地方。另外,2017年年中,LGV高速鐵路將會接通巴黎同波爾多,兩地往來只需要2個鐘,相信屆時旅客數量將會增加,變成交通更方嘅旅遊城巿。

當然唔單止咁,為咗鞏固酒城嘅地位,波爾多就起咗個「葡萄酒之城」(La Cité du Vin)! 葡萄酒之城唔係酒池肉林,而係一個大型博物同展覽館,外形就似大地上豎立嘅一個大型醒形瓶,如果撞正日落,陽光折影,簡直酒不醉人人自醉。

葡萄酒之城預計每年吸引45萬名人士參觀,旅客可以了解從古至今嘅千年釀造工藝同文化。呢度仲有一個3,500平方米大嘅常設展覽區,另有臨時展覽區,一個有250個座位並且用於安排藝術、文化及科學活動的禮堂,可以話係全球最完善嘅紅酒展博物展覽館。

咁大嘅葡萄酒之城又唔係吓吓講酒咁hard sell嘅,建築第7層有個離地30米高嘅觀光餐廳,畀旅客食住嘢欣賞加龍河(Garonne)同波爾多風景,夠晒好feel,成個package啱晒愛酒同追求浪漫之人。

 

No.2 南非 開普敦

 

▼去得開普敦,點可以唔上Table Mountain?唔坐纜車,辛苦啲徒步都可以行上去

 

排第二係治安好差,但風景勁靚嘅南非開普敦。位於非洲南端嘅開普敦係成個非洲最國際化嘅城巿。搭纜車或行上Table Mountain(中譯桌山,好核突),可以將成個開普敦盡收眼底。Lonely Planet話,未上過Table Mountain山頂,唔配嚟過開普敦。

開普敦唔止Table Moutain把炮,其實佢都係南非文化藝術之都,好似剛過去9月博物館Zeitz Museum of Contemporary Art Africa (MOCAA)先至開幕,係非洲最大嘅當代藝術館,畀旅客感受現代化嘅非洲。

 

No.3 美國洛衫磯

 

▼唔單止遊客,連洛杉磯嘅居民都鍾意行Venic Beach

 

大家對美國洛杉磯一啲都唔陌生,多有錢人住,又多荷里活明星住,令人紫醉金迷。洛杉磯作為美國西岸文化重鎮,巿內嘅交通喺2016年作出改善,延申嘅地鐵鐵路增長,由Downtown到Santa Monica變得更方便,Car Free LA運動令遊客更方便咁遊覽呢個城巿,而且近年有50間酒店落成,已成為西岸最重要嘅旅遊同文化城巿。

講起洛杉磯,不得不提係世界獨一無二嘅Venice Beach。呢個海灘可以話係美國文化縮影,沿住 Venice Boardwalk(真名叫Ocean Front Walk)行,你會見到唔同嘅街頭藝術家,有精於表演嘅,亦有濫竽充數嘅,唔會好似旺角行人專用區咁已被大媽霸佔晒。

香港個星光大道被指係世上最不符實嘅景點之一,而荷里活版本嘅Hollywood Walk of Fame星光大道,由1960年至今,已有超過2,400個明星打過手印,真係唔明香港果個點解咁受內地人歡迎。

 

No.4 墨西哥 梅里達

 

▼2016年成為美洲文化之都嘅墨西哥梅里達

 

排第4係墨西哥梅里達。Lonely Planet認為梅里達同其他喺猶加敦半島嘅城巿唔同,因為呢度夠多沙灘同拉丁音樂同舞蹈,而且2016年仲被選中做美洲文化之都,預計成個2017年都有好多文化節目。值得一提嘅係,梅里達係墨西哥最安全嘅地方。

 

No.5 馬其頓 奧赫里德

 

▼喺奧赫里德湖上泛舟,遠望岸上嘅別墅,真寫意

 

奧赫里德呢個名係巴爾幹國家馬其頓嘅一個城巿,又係城巿對出嘅一個大型內陸湖。Lonely Planet認為遊覽呢個湖嘅最佳方法係泛舟湖上,從湖上遠望岸上禇紅色嘅別墅,同時欣賞岸邊Car Samoil’s Castle嘅城牆,幻想呢個城巿由地區宗教中心變做今日繁忙嘅度假勝地。過度開發嘅地方始終會變質,所以Lonely Planet都呼籲想去嘅人盡快去,唔好哂咗個可能係最靚嘅內陸湖。

 

No.6 意大利 皮斯托亞

 

▼皮斯托亞有小佛羅倫斯之稱

 

因為同係藝術同建築之都,皮斯托亞有小佛羅倫斯之稱,不過就往往被人忽略咗佢嘅存在。不過情況將會喺2017年改變了,事關皮斯托亞將搖身一變,變成意大利嘅文化之都。Lonely Planet認為皮斯托亞係意大利托斯卡尼地區中,細小但最有活力嘅地方。

 

No.7 南韓 首爾

 

▼唔知清溪川喺港女心目中嘅排名係點?

 

講起南韓,仲要係首爾,唔少港男港女應該認識好深。不過Lonely Planet睇嘢始終深入啲,認為首爾係比以往更綠化嘅城巿,更具魅力之餘,交通亦比以前更方便,仲點埋名首爾嘅清溪川,大讚拆卸嘅高架道路變成大型公園好正,同埋個露天水道非常吸引咁話。

 

No.8 葡萄牙 里斯本

 

▼里斯本嘅旅遊魅力常被忽略

 

葡萄牙同里斯本喺歐洲嘅旅遊地位,有時難免被西班牙搶去風頭,事實上講文化同美食,里斯本一啲都唔輸蝕,而且喺歐元較平嘅情況下,消費水平較歐洲其他地方低嘅葡萄牙真係幾吸引。

 

No.9 俄羅斯 莫斯科

 

▼2018年後嘅莫斯科會變成點?

 

莫斯科喺2017年開始會有大轉變了。首先因為2017年搞洲際國家盃,之後2018年又搞世界盃,新落成嘅機場Ramenskoye Airport同新地鐵線將大大加強城巿嘅內部交通連繫。趁莫斯科未大變身之前,建議大家去睇睇,2018年之後再返嚟睇睇個變遷。

 

No.10 美國 俄勒岡州 波特蘭

 

▼筆者好想深入了解,波特蘭點解可以成為美國城巿嘅典範

 

排第10嘅波特蘭雖然一直冇點吸引過人注意,但Lonely Planet認為佢將會係美國城巿嘅未來典範,其中友善同可持續發展係呢個城巿最大賣點,而且多種族聚居,生活質素又高,好啱旅客嚟走走。Lonely Planet話2017年8月21日喺呢度睇日蝕夠晒正。Lonely Planet仲建議揸幾哩路車到 Willamette Valley或者行上 Mt Hood,仲可以當晚9:06am至11:38睇埋個靚月蝕添!

分享: